“Robotika – Porta drejt Inovacionit dhe Teknologjisë” në gjimnazin Elit

Në ambientet e gjimnazit Elit u zhvillua me sukses aktiviteti informues me titull “Robotika – Porta drejt Inovacionit dhe Teknologjisë”, i cili u prit me interes dhe entuziazëm nga maturantët pjesëmarrës. Qëllimi i këtij aktiviteti ishte të promovonte rëndësinë e robotikës si një nga fushat më premtuese në zhvillimin e teknologjisë dhe inovacionit.

Referimi i kësaj teme u realizua nga Dr. Sokol Shurdhi, pedagog dhe ekspert në fushën e teknologjisë së informacionit, i cili solli një qasje të qartë dhe frymëzuese për mënyrën sesi robotika mund të shërbejë si urë lidhëse mes njohurive teorike dhe praktikës së avancuar teknologjike.

Gjatë prezantimit, u theksua roli kyç që robotika luan në ndërlidhjen e njohurive teorike me zbatimin e tyre praktik. Një moment veçanërisht i vlerësuar nga të pranishmit ishte demonstrimi i një prototipi robotik, ndërtuar nga studenti Jusuf Rustaj i Departamentit të Informatikës, në ambientet e STEAM Fab Lab. Ai ndau me të rinjtë përvojën e tij në procesin e ndërtimit të robotit, duke shpalosur hapat konkretë të realizimit të projektit – nga konceptimi, programimi, deri te testimi i funksionaliteteve.

Ky shembull praktik e konkretizoi qartë mënyrën sesi njohuritë teorike të fituara gjatë studimeve mund të shndërrohen në zgjidhje reale teknologjike. Pjesëmarrësit treguan interes të lartë dhe u përfshinë në diskutime aktive, duke shtruar pyetje, ndarë mendime dhe eksploruar ide për projekte të ngjashme.

Interaktiviteti, reflektimi dhe motivimi i nxënësve për të ndjekur më tej rrugën e teknologjisë dhe inovacionit janë dëshmi e qartë e suksesit të këtij prezantimi dhe vlerës së tij edukative. Aktiviteti shërbeu si një burim frymëzimi për të rinjtë që dëshirojnë të ndërtojnë të ardhmen e tyre në fushat STEM, me fokus të veçantë në robotikë.